O baúl dos contos esquecidos é o resultado dun coidadoso proceso de creación onde relato, ilustración, corrección e maquetación se entrelazan para explorar a profunda relación entre educación e saúde, coñecemento e amor. Tomando como guía a frase de Bertrand Russell: «A boa vida é unha vida inspirada polo amor e guiada polo coñecemento», este libro pretende abordar temas de saúde actuais como a morte, a xestión emocional, a comunicación terapéutica e o estigma na saúde mental. Grazas a personaxes imaxinarios como a ratiña Serotonina, o mosquito Estigma e a londra Faíscas, invítase a lectores de todas as idades a somerxerse en emocionantes aventuras literarias que buscan fomentar unha vida máis plena e consciente. Confío en que o esforzo dos que fixeron posible este libro atinxa o seu obxectivo e nos impulse a ser mellores persoas.
